Ethiopia Exchange Services: ethiox.com

በቃ!

ወያኔ ሥልጣን ከያዘበት ጊዜ ጀምሮ ላለፉት 20 ዓመታት በሃገራችን ህልውናና በዜጎቿ ላይ እያደረሰ ያለውን በደል እንዲያበቃ በሰላማዊ መንገድ ተጠይቆ አሻፈረኝ ካለ ቆይቷል። ለኢትዮጵያ አንድነትና ብልጽግና በሰላም የሚታገሉ ሀይሎችን በስውርና በአደባባይ አስሯል፥ ደብድቧል፥ ገሏል፥ የተረፉት አገር ጥለው እንዲሰደዱ አስገድዷል። ድምጻችን ይከበር በማለት ሠላማዊ ሰልፍ የወጡ ንጹህ ዜጎች በአሰቃቂ ሁኔታ በአደባባይ በጥይት ተደብድበዋል። ህዝብን እርስ በርስ በማናከስ ሆድና ጀርባ ለማድረግ ሞክሯል። የአገራችን መሬት እየተሸነሸነ ለባዕዳን በመከፋፈል ላይ ይገኛል፡፡ የሀገሪቷን መዋዕለ ንዋይ ጨምሮ ዋና ዋና የኢኮኖሚ አውታሮች በወያኔ አባላትና የጎሳ ትስስር ባላቸው ባለሥልጣናት ተይዟል። ዜጎች በገዢው ፓርቲ ሰላዮች፥ ካድሬዎችና ታጣቂዎች እየተዋከቡ በገዛ ሀገራቸው ሰርተው መኖር አቅቷቸው ለመሰደድ እየተገደዱ ነው።

የወያኔን አገዛዝ የኢትዮጵያ ህዝብ “በቃ” ያለበት ጊዜ ዓመታት ቢያስቆጥርም በተቃዋሚ ድርጅቶች መሃከል በነበሩ ድክመቶችና እንዲሁም በመለስ ዜናዊና ግብረአበሮቹ አረመኔዊ ጥቃቶች ምክንያት ዕድሜው ሊራዘም ችሏል። ሆኖም ግን ከዚህ በፊት ከተፈጸሙ ስህተቶች ትምህርት በመቅሰም የተለያዩ የፖለቲካ ድርጅቶችና የአርበኝነት ትግል ሲያካሂዱና ሲደግፉ የቆዩ በሀገር ውስጥና በዓለም ዙሪያ የሚገኙ ኢትዮጵያውያን ህብረት በመፍጠር ኢትዮጵያን ከወያኔ ፋሽስታዊ አገዛዝ ነፃ ለማውጣት ትንሳኤ ኢትዮጵያ የአርበኞች ህብረት በሚባል ድርጅት ስም ተሰባስበው በዕቡህ ሲንቀሳቀሱ ቀይተው ከዛሬ ጀምሮ እንቅስቃሴውን ለህዝብ ይፋ አድርገዋል። ትንሳኤ ኢትዮጵያ ለሀገር ወዳድና ለመብት ተቆርቋሪ ኢትዮጵያዊ ሁሉ የድጋፍና የትብብር ጥሪ ያቀርባል።

“በቃ” በሚል መሪ መፈክር የወያኔው ቁንጮ መለስ ዜናዊና ግብረዓበሮቹን በተባበረ የህዝብ ሃይል ከስልጣን አስወግደን የስርዓት ለውጥ በማምጣት ህዝብ በነፃነት የመረጠው መንግስት ተቋቁሞ አዲሲቷ ኢትዮጵያን የሰላም፤ የፍትህና የብልጽግና ጎዳና ለማስያዝ እንታገል።

በቃ ጭቆና! በቃ ሰቆቃ!
በቃ የህዝብ ንብረት ዘረፋ!
በቃ የወያኔ የግፍ አገዛዝ!

ድል ለኢትዮጵያ ሕዝብ!

ለግንኙነት
ኢሜይል tinsae.ethiopia@gmail.com
www.tinsae.org